Bydd EESW yn lansio'r prosiect gyda gweithdy rhagarweiniol hanner diwrnod. Mae pob pecyn adnoddau i’r dosbarth yn darparu popeth sydd ei angen ar dimau o 5 neu 6 disgybl i sefydlu eu micro:fferm eu hunain a thyfu cnwd o blanhigion micro-wyrdd – gan gynnwys micro:bit, cydrannau rheoli amgylcheddol, tŷ gwydr dan do mewn pecyn fflat a phecyn tyfu ar gyfer plannu pridd traddodiadol neu dechnegau hydroponig sylfaenol.
Yn ystod y gweithdy mae pob disgybl yn cwblhau gweithgaredd codio micro:bit cyn cael rolau yn y tîm a chymryd cyfrifoldeb am wahanol agweddau ar gyfnod rhoi’r tŷ gwydr at ei gilydd a bydd hyn hefyd yn eu hannog i feddwl sut y gallai eu sgiliau gyfateb i gyfleoedd gyrfa cysylltiedig â STEM yn y dyfodol. Bydd y tai gwydr yn barod i'w plannu yn dilyn y gweithdy rhagarweiniol. Yna gall disgyblion blannu eu cnwd a goruchwylio'r cylch tyfu, cyn profi eu cynnyrch 7 i 10 diwrnod yn ddiweddarach. Gellir cwblhau prosiectau mewn pythefnos neu gallwn gynnig benthyciad cit hirach 4 i 6 wythnos sy'n caniatáu ar gyfer mwy nag un cylch tyfu a'r potensial ar gyfer mwy o ymchwil, dadansoddi a hyd yn oed cystadleuaeth dan arweiniad athrawon neu ddisgyblion.
Mae'r cyflwyniadau a'r adnoddau ategol sydd wedi'u targedu'n bennaf at Gam Cynnydd 3 yn ystyried cynaliadwyedd trwy ffermio trefol a ffermio mewn amgylchedd rheoledig – gan ddod â chynhyrchu bwyd i gymunedau trefol, lleihau milltiroedd bwyd ac ailgysylltu defnyddwyr â chyflenwadau bwyd.
Mae ein partneriaeth gyda'r Gymdeithas Gemeg Frenhinol hefyd yn rhoi cyfle i ddisgyblion archwilio'r newidiadau cemegol sy'n digwydd yn ystod twf planhigion a chynnal profion asidedd ar y pridd wrth iddynt geisio darparu'r amodau tyfu gorau posibl ar gyfer eu cnwd.
Unwaith bydd y llefydd hyn wedi eu llenwi, gallwn gynnig y gweithgaredd hwn i’w ddarparu yn eich ysgol am gost o £795 y dosbarth.
Yng Ngham Cynnydd 4 mae'r prosiect wedi'i wreiddio yn yr effaith y mae dulliau ffermio cyffredinol yn ei chael ar fioamrywiaeth yng Nghymru.
Mae gofynion y prosiect a'r cyfleoedd i ymestyn i CC4 yn dod o bwyslais cynyddol ar gasglu data a'r cyfle i ddadansoddi data.
“Roedd yn wirioneddol ddiddorol. Yn wahanol i unrhyw beth y gallwn ei gynnig yn yr ysgol. Roedden nhw wrth eu bodd yn cael rolau gwahanol a bod yn rhan o bob agwedd ar y prosiect - doedd dim yn cael ei wneud drostyn nhw.”
Athro Blwyddyn 5, Casnewydd
“Roedd yn ymdrin â chymaint o feysydd o'r cwricwlwm newydd mewn ffordd wirioneddol ddilys, pwrpasol a deniadol. Roedd y dysgu'n gyfredol ac yn berthnasol iawn i'r byd modern, roedd plant wrth eu bodd â'r holl broses – o’r ymchwil, i’r adeiladu a’r tyfu.”
Athro Blwyddyn 6, Cwmbrân
“Mae'r amrywiaeth o brofiadau yn cadw ysgogiad y plant drwyddi draw. Roedd y prosiect yn ymdrin â sawl agwedd ar y cwricwlwm ac fe'i cyflwynwyd yn dda i gynnal diddordeb y plant. Byddwn yn bendant yn ei wneud eto!”
Athro Blwyddyn 6, Penarth